ដឹកបងប្អូនពីខេត្តព្រៃវែងមកហូបការនៅបន្ទាយមានជ័យ ក្រឡាប់រថយន្តស្លាប់៤ របួសធ្ងន់ស្រាល១១នាក់
បន្ទាយមានជ័យ៖ មនុស្ស៤នាក់បានស្លាប់នៅនឹងកន្លែង ខណៈមនុស្ស១៥នាក់ទៀត បានរងរបួសធ្ងន់ស្រាល ក្នុងករណីក្រឡាប់រថយន្ត តាកូម៉ា១គ្រឿង នៅតាមបណ្តោយផ្លូវជាតិលេខ៥៦ ស្ថិតក្នុងភូមិបន្ទាយឆ្មារជើង ឃុំបន្ទាយឆ្មារ ស្រុកថ្មពួក។
លោក ប៊ិច វ៉ានថា នាយប៉ុស្តិ៍នគបាលឃុំបន្ទាយឆ្មារ បានឲ្យដឹងថា កាលពីវេលាម៉ោង១១ព្រឹក ថ្ងៃទី១១ មករា ឆ្នាំ២០១៦ រថយន្តខាងលើ ស្លាកលេខ ខេត្តកណ្តាល 2A-6695 បានធ្វើដំណើរពីខេត្តព្រៃវែងឆ្ពោះមកខេត្តបន្ទាយមានជ័យ ដើម្បីចូលរួមពីធីអាពាហ៍ពិពាហ៍បងប្អូន លុះបើកដល់ចំណុចកើតហេតុ ក៏បែកកង់ខាងឆ្វេងបណ្តាលឲ្យក្រឡាប់២-៣ត្រឡប់ ចាក់មនុស្សដេកដួលរណូករណែលពេញថ្នល់ជាតិ ស្លាប់ និងរងរបួសតែម្តង។
លោកបន្ថែមថា ជនគ្រោះដែលស្លាប់ក្នុងករណីគ្រោះថ្នាក់នេះ ទី១ឈ្មោះ សាំង អ៊ុច ភេទប្រុស អាយុ៤៥ឆ្នាំ ទី២ សាំង រុតស័ក្តិ ភេទប្រុស អាយុ១៩ឆ្នាំ ៣ សុខ គល់ ភេទស្រី អាយុ៩ឆ្នាំ និងទី៤ មិនទាន់ស្គាល់ឈ្មោះ។ ចំណែកអ្នករងរបួស១១នាក់ទៀត សុទ្ឋតែរស់នៅស្រុកកញ្ជ្រៀចខេត្តព្រៃវែង។
ក្រោយកើតហេតុ ជនរងគ្រោះទាំង១១នាក់ ត្រូវបាននាំទៅសង្គ្រោះបន្ទាន់នៅមន្ទីពេទ្យ ដោយឡែកសពជនរងគ្រោះទាំង៤នាក់ ត្រូវបញ្ជូនទៅកាន់ខេត្តព្រៃវែងដើម្បីធ្វើបុណ្យតាមប្រពៃណី៕
0 comments:
Post a Comment