វិធីឈានឆ្ពោះទៅរកភាពឆ្លាតវៃ
ខួរក្បាលរបស់មនុស្សតម្រូវឲ្យមានការធ្វើលំហាត់ប្រាណដើម្បីឲ្យមាន ភាពរឹងមាំ និងភាពឆ្លាតវៃ ប៉ុន្តែការធ្វើលំហាត់ប្រាណខួរក្បាលមិនដូចជាការធ្វើលំហាត់រាង កាយធម្មតានោះទេ។ ប្រសិនបើចង់ធ្វើលំហាត់ប្រាណខួរក្បាល លោកអ្នកត្រូវតែឧស្សាហ៍ ប្រើប្រាស់ខួរក្បាលនៅក្នុងរប្រៀបមួយដ៏ត្រឹមត្រូវ។ ប្រាកដណាស់ថា ប្រសិនបើលោកអ្នក មិនសូវប្រើប្រាស់ខួរក្បាលដើម្បីយកមកគិតពិចារណា សមត្ថភាពក្នុងការ គិតរបស់ខួរក្បាលលោកអ្នកនឹងមានភាពយឺតយ៉ាវ ឬអាចឈានដល់ការបាត់បង់នូវសមត្ថភាពក្នុងការគិតក៏អាចថាបាន។ ដូចនេះដើម្បីពង្រឹងនូវការគិត និងដើម្បីឈានឆ្ពោះទៅរកភាពឆ្លាតវៃ លោកអ្នកអាចព្យាយាមអនុវត្តនូវវិធីសាស្ត្រខាងក្រោមនេះ។
វិធីទី១ : លោកអ្នកគួរគប្បីអានសៀវភៅឲ្យបានច្រើន។ មនុស្សភាគច្រើនចូលចិត្តអានសៀវភៅ រឿងតុក្កតា ឬសៀវភៅរឿងព្រេងផ្សេងៗ ដែលមិនអាចជំនួយទៅដល់ការគិតរបស់ខួរក្បាល។ ប្រសិនបើចង់ឲ្យការគិត និងសមត្ថភាពក្នុងការសរសេរ កាន់តែមានភាពរីកចម្រើន លោកអ្នកគួរគប្បី អាននូវសៀវភៅរឿងប្រលោមលោក ពីព្រោះវាអាចជួយឲ្យលោកអ្នកផ្លាស់ប្តូរការគិតពិចារណា និងអាចឲ្យលោកអ្នកស្គាល់នូវពាក្យថ្មីៗជាច្រើនថែមទៀត។
វិធីទី២ : កាត់បន្ថយការមើលទូរទស្សន៍ ប៉ុន្តែវាពិតជាការលំបាកមួយសម្រាប់មនុស្សដែលញៀនមើលទូរទស្សន៍។ លោកអ្នកគួរយល់ថា ការមើលទូរទស្សន៍ច្រើន ឬយូរពេកអាចជះឥទ្ធិពលដល់សុខភាពភ្នែក ហើយវាជាហេតុដែលបណ្តាលឲ្យភ្នែករបស់លោកអ្នកស្រវាំងមិនមានកម្លាំង គ្រប់គ្រាន់ក្នុងការអានសៀវភៅ។ ជាទូទៅ ប្រសិនបើលោកអ្នកចំណាយពេលវេលាច្រើនក្នុងការមើលទូរទស្សន៍ លោកអ្នកនឹងគ្មានពេលវេលាគ្រប់គ្រាន់ ដើម្បីអានសៀវភៅ។ ដូច្នេះលោកអ្នកគួរគប្បីកាត់បន្ថយការមើលទូរទស្សន៍ហើយចំណាយពេលវេលា អានសៀវភៅដើម្បីបង្កើននូវ ចំណេះដឹងវិញប្រសើរជាជាង។
វិធីទី៣ : ការធ្វើលំហាត់ប្រាណរាងកាយក៏ជាផ្នែកមួយក្នុងការបង្កើននូវភាពឆ្លាតវៃ។ លោកអ្នកប្រហែលជាគិតថា ប្រសិនបើចំណាយពេលវេលាហាត់ប្រាណ ទៅអានសៀវភៅអាចបង្កើតនូវភាពឆ្លាតវៃបានកាន់តែខ្លាំង ប៉ុន្តែផ្ទុយទៅវិញនេះគឺជាការយល់ច្រឡំទាំងស្រុងពីព្រោះការធ្វើលំហាត់ប្រាណរាងកាយអាចជួយឲ្យ លោកអ្នកបញ្ចេញ នូវសារធាតុពុលចេញពីក្នុងរាងកាយដែលអាចនាំឲ្យលោកអ្នកងាយស្រួលក្នុងការពង្រឹងស្មារតី និងអាចផ្តោតអារម្មណ៍បានកាន់តែប្រសើរ។
វិធីទី៤ : លោកអ្នកគួរគប្បីចូលគេងពីព្រលប់ និងភ្ញាក់ពីព្រលឹមហើយមិនត្រូវគេងលើសពីប្រាំបីម៉ោង។ ការធ្វើបែបនេះអាចធ្វើឲ្យលោកអ្នកមានស្មារតីជ្រះថ្លាក្នុងការ ផ្តោតអារម្មណ៍ទៅលើការរៀនសូត្រ ឬការធ្វើការងារផ្សេងៗបានកាន់តែល្អប្រសើរ និងជាហេតុដែលអាចឲ្យលោកអ្នកមានភាពវៃឆ្លាតជាងមុន៕
0 comments:
Post a Comment