ភាពជោគជ័យនឹងស្ថិតនៅក្នុងកណ្តាប់ដៃអ្នក ប្រសិនបើអនុវត្តនៅចំណុចទាំង ៨ នេះ
១) ត្រូវយល់ពីមូលហេតុរបស់មនុស្សដទៃ
អតិថិជនមិនបានទិញផលិតផល ឬ សេវាកម្មដែលអ្នកបានបង្កើតឡើងនោះទេ តាមពិតពួកគេគឺទិញនូវមូលហេតុដែលអ្នកធ្វើវាទៅវិញនោះទេ។ នៅពេលដែលបណ្តាក្រុមហ៊ុន អាជីវកម្មនានា ប្រាប់អ្នកពីអ្វីដែលពួកគេកំពុងលក់ និងពីវិធីដែលអ្នកអាចទិញទិញវាបាន មានន័យថាពួកគេទាំងអស់នោះ កំពុងតែចែករំលែកពីហេតុផល ហេតុអ្វីបានជាពួកគេធ្វើវា អ្វីដែលពួកគេធ្វើ ហើយនឹងហេតុអ្វីបានជាអ្នកគួរតែទិញវា នឹងប្រើប្រាស់វា។
២) បង្កើតវិន័យឲ្យខ្លួនឯង
ជាទម្លាប់របស់មនុស្សជោគជ័យ ពួកគេចូលចិត្តសិក្សារៀនសូត្រជាមនុស្សសិន មុននឹងទៅធ្វើការប្រកួតប្រជែងណាមួយ ដូច្នេះពួកគេជាមនុស្សដែលក្រោកពីព្រលឹម ហើយចាប់ផ្តើមធ្វើការងារមុនគេ។ បន្ថែមពីលើនេះ បុគ្គលជោគជ័យ តែងចំណាយពេលពី ៣០ ទៅ ៦០ នាទី ដើម្បីអានសៀវភៅ ឬ អត្ថបទព័ត៌មានផ្សេងៗ ដើម្បីធ្វើឲ្យអារម្មណ៍ពួកគេមានភាពស្រស់ស្រាយ និង ទទួលបានចំណេះដឹងថ្មីៗ។ ពួកគេជាមនុស្សដែលចេះបែងចែក នូវកិច្ចការងារណាដែលជាការងារអាទិភាពដើម្បីបញ្ចប់។ នៅពេលដែលអ្នកចេះកំណត់នូវគោលការណ៍ឲ្យខ្លួនឯងដូច្នេះ លទ្ធផលនិងអត្រានៃភាព ជោគជ័យ នឹងក្លាយជារឿងដែលអ្នកអាចស្មានទុកជាមុន។
៣) កុំធ្វើការសន្មត ដោយគ្មានសំអាង
នៅពេលដែលអ្នកបង្កើតការសន្មត នោះមានន័យថាអ្នកកំពុងបង្កើតភាពមិនច្បាស់លាស់ ឲ្យខ្លួនឯង ហើយចំពោះមនុស្សដែលមានទំនោរចូលចិត្តធ្វើការសន្មត ព្រោះដោយសារពេលខ្លះ ពួកគេជាមនុស្សដែលមានអំនួតខ្លួនឯងខ្លាំងពេក ឬមានភាពភ័យខ្លាច និង ខ្មាសអៀនដើម្បីសុំការបកស្រាយ ឲ្យបានច្បាស់ ពីមនុស្សដទៃ។ ខុសពីបុគ្គលជោគជ័យ ពួកគេជាមនុស្ស ដែលដឹងច្បាស់ថា វានឹងមានភាពល្អប្រសើរ នៅពេលដែលសំនួរដើម្បីរកការបញ្ជាក់អះអាងឲ្យបានច្បាស់លាស់។
៤) រក្សារឿងគ្រប់យ៉ាងឲ្យមានភាពសាមញ្ញធម្មតា
នៅពេលដែលធ្វើរឿងអ្វីមួយឲ្យក្លាយទៅជាភាពសាមញ្ញ វាអាចជួយធ្វើឲ្យអ្នកកាន់តែមានភាពងាយស្រួលក្នុងការពន្យល់ទៅកាន់មនុស្សដទៃ និង ងាយស្រួលក្នុងការធ្វើ។ នៅពេលដែលអ្នកមិនអាច ពន្យល់រឿងអ្វីមួយ ទៅកាន់នរណាម្នាក់ នោះមានន័យថាអ្នកមិនបានយល់ច្បាស់ពីរឿងនោះឡើយ។ បុគ្គលជោគជ័យ គឺជាមនុស្ស ដែលចេះធ្វើឲ្យរឿងគ្រប់យ៉ាងក្លាយជារឿងសាមញ្ញ ដែលធ្វើឲ្យមនុស្សដទៃទៀត មានភាពងាយស្រួលដើម្បីយល់ពីវា។
៥) ធ្វើលំហាត់ប្រាណទាំងផ្លូវចិត្ត និង រាងកាយ
បុគ្គលជោគជ័យភាគច្រើន តែងធ្វើការហាត់ប្រាណជារៀងរាល់ថ្ងៃ ជាពិសេសនៅពេលព្រឹកព្រលឹម ការចាប់ផ្តើមជាមួយការហាត់ប្រាណនាព្រឹកព្រលឹម ព្រោះវាផ្តល់នូវថាមពលដល់រាងកាយ និង បង្កើតឲ្យមានស្មារតី រឹងមាំ។ គ្រប់បុគ្គលជោគជ័យ យល់ច្បាស់ពីសុខភាព ផ្លូវចិត្ត ថាជារបស់ដ៏សំខាន់ ហើយលំហាត់ប្រាណ នាព្រឹកព្រលឹម គឺជាពេលវេលាល្អបំផុត។
៦) ត្រូវមានភាពប្រុងប្រយ័ត្នចំពោះទស្សនៈ ពាក្យសម្ដី និង សកម្មភាពខ្លួនឯង
សុភាសិតចិនបានពោលថា ត្រូវប្រយ័ត្នចំពោះគំនិតខ្លួនឯង ព្រោះគំនិតនាំទៅបង្កើតពាក្យសម្តីឲ្យខ្លួនឯង ត្រូវប្រយ័ត្នចំពោះសម្តីខ្លួនឯង ព្រោះសម្តីនាំទៅបង្កើតសកម្មភាព ត្រូវប្រយ័ត្នចំពោះសកម្មភាពខ្លួនឯង ព្រោះសកម្មភាព នាំទៅបង្កើតទម្លាប់ ត្រូវប្រយ័ត្នចំពោះទម្លាប់ខ្លួនឯង ព្រោះទម្លាប់នាំទៅបង្កើតអត្តចរិត ត្រូវប្រយ័ត្នចំពោះអត្តចរិតខ្លួនឯង ព្រោះអត្តចរិត ក្លាយជាអ្នកដែលកំណត់ជោគវាសនារបស់អ្នក។ បុគ្គលជោគជ័យជាមនុស្ស ដែលគិតមុននិយាយ ពិភាក្សាវែកញែក វាយតម្លៃមុនធ្វើសកម្មភាព។
៧) ដឹងពីប្រព័ន្ធនៃការបង្កើតភាពជោគជ័យ
ដើម្បីបង្កើតប្រព័ន្ធធ្វើការប្រកបដោយភាពជោគជ័យ ត្រូវចេះបែងចែកការងារ ជាដំណាក់កាលតូចៗ ហើយត្រូវពិចារណាថា ការងារមួយណាដែលខ្លួនអាចធ្វើបាន និង ការងារណាដែលខ្លួនធ្វើមិនបាន។ ការបែងចែក ការងារទៅជាដំណាក់កាលតូចៗ អាចជួយធ្វើឲ្យអ្នក បញ្ចប់ការងារបានយ៉ាងឆាប់រហ័ស និងប្រកបដោយប្រសិទ្ធភាព។ ការអភិវឌ្ឍប្រព័ន្ធការងារមួយ ដែលអាចជួយបង្កើតភាពខ្លាំង របស់អ្នក គឺជាលក្ខណៈពិសេស ក្នុងការបង្កើតភាពជោគជ័យ។
៨) ផ្ដាច់ខ្លួនចេញពីសង្គម
ទាំងរាងកាយ និង ផ្លូវចិត្ត គឺសុទ្ធតែត្រូវការពេលវេលាដើម្បី សម្រាក និង លំហែ ការចំណាយពេលសម្រាកពីការងារ ការផ្តាច់ខ្លួនចេញឲ្យឆ្ងាយពីបច្ចេកវិទ្យា គឺជារឿងសំខាន់ ដែលបុគ្គលជោគជ័យភាគច្រើនបានដឹង និង ធ្វើ។ ការលះបង់ពេលវេលា ដោយគ្មាននូវឧបករណ៍ បច្ចេកវិទ្យា គឺជាសោសំខាន់របស់បុគ្គលជោគជ័យ ដើម្បីបង្កើតពេលវេលា ដ៏មានសារសំខាន់សម្រាប់ខ្លួនឯង និងគ្រួសារ។
ប្រភព៖ Thebnews
0 comments:
Post a Comment