សន្យាថានឹងចូលស្តីដណ្តឹងនាង ហើយលួងលោមយកទៅរំលោភជាច្រើនដង

បាត់ដំបង ៖ យុវជនម្នាក់ ដែលជាជនសង្ស័យពាក់ព័ន្ធនឹងករណីចាប់រំលោភសេពសន្ថវៈត្រូវបានកម្លាំងកងរាជអាវុធហត្ថខេត្តអនុវត្តតាមបញ្ជារបស់លោកព្រះរាជអាជ្ញារងហេង លុយ ធ្វើការឃាត់ខ្លួនកាលពីថ្ងៃទី៤ ខែកុម្ភៈ ឆ្នាំ២០១៦ វេលាម៉ោង០០និង១០នាទី រំលងអធ្រាត្រត្រង់ចំណុចភូមិកម្មករ សង្កាត់ស្វាយប៉ោ ក្រុងបាត់ដំបង បន្ទាប់ពីជននេះកំពុងរងនូវការចោទប្រកាន់ពីសំណាក់អាណាព្យាបាលរបស់នារីរងគ្រោះ។គួរបញ្ជាក់ដែរថា នៅថ្ងៃទី៣០ ខែមករា ឆ្នាំ២០១៦ រឿងរ៉ាវនៃករណីចាប់រំលោភសេពសន្ថវៈលើនារីវ័យក្មេងម្នាក់ ត្រូវបានធ្លាយអាថ៌កំបាំងធ្វើឲ្យស្ត្រីជាម្ដាយឈ្មោះដាំ ពៅ អាយុ៤៥ឆ្នាំ រស់នៅភូមិអណ្តូងចេញ សង្កាត់អូរចារ ក្រុងបាត់ដំបង បានកើតទុក្ខមិនសុខចិត្ត ទើបបានចូលខ្លួនទៅទីបញ្ជាការដ្ឋានកងរាជអាវុធហត្ថដើម្បីដាក់ពាក្យប្តឹងទៅលើយុវជនម្នាក់ឈ្មោះ អ៊ុក អួនរ័ត្នរុណ អាយុ១៧ឆ្នាំ មានមុខរបរជាជាងថតរូបរស់នៅភូមិចំការឫស្សី សង្កាត់ព្រែកព្រះស្តេច ក្រុងបាត់ដំបង ដែលបានធ្វើការល្បួងលួងលោមកូនស្រីរបស់គាត់ឈ្មោះខ.ស.ភ អាយុ១៨ឆ្នាំ ជាច្រើនលើកច្រើនសា ដោយគេបានសន្យាថានឹងចូលស្ដីដណ្ដឹង និងរៀបការក្នុងពេលឆាប់ៗខាងមុខនេះ។យោងតាមចម្លើយរបស់នារីរងគ្រោះបានបញ្ជាក់ថា ពួកគេទាំងពីរនាក់បានស្គាល់គ្នាជាយូរមកហើយ រហូតមានថ្ងៃមួយនៅក្នុងអំឡុងឆ្នាំ២០១៥ គឺយុវជនរូបនេះបានបបួល នាងថាទៅរកញុំាអីលេងនៅផ្ទះមិត្តភក្តិ ប៉ុន្តែទីបំផុតគេក៏បាននាំនាងចូលទៅក្នុងផ្ទះសំណាក់យីហោ ម៉ូរ៉ា ស្ថិតនៅភូមិអង់ សង្កាត់អូរចារ ដោយគេបាននិយាយលួងលោមសុំស្នេហ៍នាង និងបានសន្យាថានឹងចូលស្តីដណ្តឹងនាងតាមផ្លូវច្បាប់ដើម្បីរៀបការក្នុងពេលឆាប់ៗខាងមុខនេះ ហើយគេក៏បានចាប់នាងរំលោភរហូតបានសម្រេចជាច្រើនលើកច្រើនសា ប៉ុន្តែចាប់តាំងពីពេលនោះមក គេហាក់ដូចជាមានភាពសោះអង្គើយជាមួយនឹងនាងទៅវិញ ដែលសឹងតែមិនចង់និយាយស្តីជាមួយនាងថែមទៀត ទើបនាងបានសម្រេចចិត្តប្រាប់រឿងនេះដល់ឪពុកម្តាយនាងតែម្តងដើម្បីដាក់ពាក្យប្តឹងទៅលើ យុវជនរូបនេះឲ្យទទួលទោសនៅចំពោះមុខច្បាប់។នៅចំពោះមុខសមត្ថកិច្ចកងរាជអាវុធហត្ថ ជនសង្ស័យរូបនេះបានសារភាពថា ខ្លួនពិតជាបានល្បួងនាងដើម្បីរំលោភសេពសន្ថវៈមែន ដោយបានខ្លួននាងជាច្រើនលើក ច្រើនសាថែមទៀត ដោយមិននឹកស្មានសោះថា នាងដាច់ចិត្តប្តឹងមកលើខ្លួនយ៉ាងនេះសោះ ទីបំផុតគឺគេមានការភ្ញាក់ នៅពេលដែលឃើញកម្លាំងប៉េអឹមចុះមកឃាត់ខ្លួនទាំងយប់បែបនេះ។ បច្ចុប្បន្នដោយយោងតាមពាក្យបណ្តឹងរបស់ជនរងគ្រោះ និងយោងតាមចម្លើយសារភាពរបស់ជនសង្ស័យ គឺកម្លាំងកំពុងកសាងសំណុំរឿងដើម្បីបញ្ជូនខ្លួនជនសង្ស័យដែលល្មោភកាមរូបនេះទៅកាន់សាលាដំបូងខេត្តហើយ ក្នុងការចាត់វិធានការតាមផ្លូវច្បាប់៕ កម្ពុជាថ្មី

About sabaynews

This is a short description in the author block about the author. You edit it by entering text in the "Biographical Info" field in the user admin panel.